श्री. झपके यांनी शहरातील विविध प्रलंबित प्रश्नांवर सविस्तर भाष्य करताना सांगितले की,
कचरा व्यवस्थापन प्रणालीचे अद्ययावत रूपांतर,
खडबडीत व अपूर्ण रस्त्यांची तातडीने दुरुस्ती,
सार्वजनिक उद्यानांचे पुनरुज्जीवन,
वृद्ध नागरिकांसाठी ‘नाना-नानी पार्क’ उभारणी,
तसेच नगरपालिका शॉपिंग सेंटरचा फेर लिलाव यांसारख्या प्रश्नांवर ठोस उपाययोजना करणार आहेत.
शहरातील कचरा व्यवस्थापनाचा प्रश्न अनेक वर्षांपासून प्रलंबित असून, त्यावर आधुनिक तंत्रज्ञानाचा वापर करून स्वच्छ आणि कार्यक्षम व्यवस्था उभारण्याचे नियोजन त्यांनी मांडले आहे. शहरी भागातील रस्त्यांची दुरवस्था लक्षात घेऊन प्राधान्याने पक्के, सुरक्षित आणि दिव्यांनी उजळलेले रस्ते तयार करण्यावर भर देणार असल्याचे त्यांनी सांगितले.
वृद्धांसाठी विशेष सुविधा
वयोवृद्ध नागरिकांसाठी निसर्गसौंदर्यपूर्ण, फिरण्यासाठी सोयीस्कर आणि आरोग्यदायी वातावरण असलेले नाना-नानी पार्क उभारण्याची योजना त्यांनी मांडली आहे. शहरातील वृद्धांच्या आरोग्य, व्यायाम आणि संवादासाठी हे केंद्र महत्त्वपूर्ण ठरेल, अशी भावना त्यांनी व्यक्त केली.
शॉपिंग सेंटरचा फेर लिलाव – व्यापाऱ्यांसाठी मोठा दिलासा
नगरपरिषदेच्या शॉपिंग सेंटरचा फेर लिलाव हा व्यापारी आणि स्थानिक नागरिकांसाठी महत्त्वाचा मुद्दा ठरत आहे. झपके यांनी या लिलावाची प्रक्रिया पारदर्शक, नियमबद्ध आणि सर्वांसाठी न्याय्य पद्धतीने होईल, असा विश्वास व्यक्त केला. यामुळे व्यापाऱ्यांमध्ये समाधान निर्माण होणार असून शहरातील व्यापारी हालचाल अधिक सुकर होईल, असे त्यांनी नमूद केले.
“विकासकामे म्हणजे केवळ आश्वासने नव्हे; ती माझी जबाबदारी”
जनतेशी संवाद साधताना झपके म्हणाले, “विकासकामे म्हणजे निवडणुकीत दिलेली आश्वासने नव्हेत; ती माझी वैयक्तिक जबाबदारी आहे. नागरिकांचा प्रत्येक प्रश्न माझ्या दृष्टीने महत्त्वाचा आहे आणि त्यावर तातडीने उपाययोजना करणे हे माझे कर्तव्य आहे.”
त्यांनी नागरिकांना स्वच्छ, सुंदर, सुरक्षित आणि आधुनिक सांगोला देण्याचे आश्वासनही दिले आहे. राजकीय जोडगोळी किंवा पक्षीय राजकारणाच्या पलीकडे जाऊन स्वतःची स्वतंत्र कार्यशैली ठेऊन शहरासाठी काम करण्यावर त्यांचा भर असेल, असेही त्यांनी सांगितले.
मतदारांमध्ये उत्सुकता
श्री. विश्वेश झपके यांच्या उमेदवारीनंतर सांगोला शहरात चर्चांना उधाण आले आहे. अपक्ष उमेदवार म्हणून दमदार लढत देणार असल्यामुळे नागरिक, व्यापारी आणि युवा वर्गामध्ये या नवीन समीकरणाबद्दल उत्सुकता निर्माण झाली आहे. झपके यांचा विकासदृष्टीकोन आणि स्पष्ट मते पाहता त्यांची उमेदवारी निवडणुकीतील महत्त्वाचे आकर्षण ठरत आहे.
सांगोल्यातील आगामी निवडणूक वातावरण दिवसेंदिवस रंगत जात असून पुढील काही दिवसांत शहरातील राजकीय घडामोडींना अधिक गती मिळण्याची चिन्हे आहेत.
