*मस्के कॉलनीत पाण्याच्या प्रश्नावरून तणाव*
*चावीमनला पकडून ठेवत बळजबरीने पाणी सोडल्याचा आरोप**
सांगोला : प्रतिनिधी
शहरातील मस्के कॉलनी परिसरात पाणीपुरवठ्याच्या प्रश्नावरून शनिवारी सकाळी तणावपूर्ण प्रकार घडल्याची माहिती समोर आली आहे. कॉलनीतील काही नागरिकांसह शिक्षक असलेल्या जबाबदार नागरिकांनी त्या परिसरात पाणी सोडण्याची जबाबदारी असलेल्या चावीमनला पकडून ठेवत बळजबरीने पाणी सोडून घेतल्याचा आरोप होत आहे. या प्रकारामुळे परिसरात संताप व्यक्त केला जात असून संबंधितांवर कारवाई करण्याची मागणी होत आहे.
मिळालेल्या माहितीनुसार, मस्के कॉलनीमध्ये एकूण पाच रस्ते असून त्यापैकी एक आणि दोन क्रमांकाच्या रस्त्यांवर पूर्वीपासून नियमितपणे पाणी सोडले जात आहे. मात्र तीन, चार आणि पाच क्रमांकाच्या रस्त्यांवरील काही नागरिकांना पाणीपुरवठा होत नसल्याची तक्रार होती. याच कारणावरून आज सकाळी चावीमनला पकडून ठेवत पाणी सोडून घेतल्याचे सांगितले जात आहे.
दरम्यान, हा प्रकार धक्कादायक असल्याची प्रतिक्रिया परिसरातील नागरिकांकडून व्यक्त होत असून पाणीपुरवठ्यासारख्या संवेदनशील प्रश्नावर अशा प्रकारे दबाव टाकणे चुकीचे असल्याचे मत मांडले जात आहे. संबंधित घटनेची चौकशी करून चावी मनवर दबाव टाकून पाणी सोडून घेणाऱ्या दोषींवर योग्य ती कारवाई करावी, अशी मागणी नागरिकांकडून केली जात आहे.
