सांगोला नगरपरिषदेकडून घरपट्टी पाणीपट्टी गाळा भाडे वसुलीसाठी विशेष मोहीम : मुख्याधिकारी डॉ. सुधीर गवळी
सांगोला/प्रतिनिधी :
सांगोला नगरपरिषदे कडून घरपट्टी पाणीपट्टी गाळा भाडे वसुलीसाठी विशेष वसुली मोहीम राबविण्यात आली असून नागरिकांनी आपली घरपट्टी पाणीपट्टी व गाळा भाडे भरून सहकार्य करावे असे आवाहन मुख्याधिकारी डॉ. सुधीर गवळी यांनी केले आहे. नागरिकांनी घरपट्टी पाणीपट्टी व गाळा भाडे भरून सहकार्य करावे अन्यथा कडक कारवाई करण्यात येणार आहे सन २०२५ २६ या आर्थिक वर्षासाठी सांगोला नगरपरिषदेची थकीत व चालू वर्षाची एकूण मालमत्ता कर मागणी ६५३.४५ लक्ष रुपये आहे. त्यापैकी २८ फेब्रुवारी २०२६ अखेर एकूण वसुली २८७.६८ लक्ष (४४%) एवढी झालेली आहे. पाणीपट्टी एकूण मागणी २८४.८२ लक्ष असून आज रोजीपर्यंत ९८.२१ लक्ष वसुली झालेली आहे.
दि. १ मार्चपासून शनिवार, रविवार व सुट्टीच्या दिवशीही मालमत्ता कर व पाणीपट्टी भरणा करण्यासाठी नगरपरिषद कार्यालय सुरू राहील. थकबाकी धारकाकडून घरपट्टी, पाणीपट्टी, गाळा भाडे वसुली वाढविण्यासाठी नगरपरिषदेचे मुख्याधिकारी डॉ सुधीर गवळी यांचे मार्गदर्शनाखाली ९ विशेष वसुली पथके नियुक्त करण्यात आलेली आहेत. सदर पथकामध्ये प्रियांका पाटील, कर निरीक्षक, रोहित गाडे, सचिन पाडे, कार्यालय अधीक्षक, महेश राजपूत, अस्मिता निकम, कर व प्रशासकीय अधिकारी व इतर कर्मचारी यांचा समावेश आहे. सदर पथकांमार्फत घरोघरी जाऊन घरपट्टी, पाणीपट्टी वसुली करण्यासाठी भेटी देण्यात येत आहेत. सर्व मालमत्ताधारकांनी सुजाण नागरिक बनून आपल्या थकीत व चालू रकमेचा भरणा नगरपरिषद कार्यालयात करावा, असे आवाहन मुख्याधिकारी डॉ सुधीर गवळी यांनी केले आहे.
थकित मालमत्ता धारकांनी आपल्या थकीत व चालू रकमेच्या भरणा नगरपरिषद कार्यालयात न केल्यास अशा मालमत्ता धारकावर नळ कनेक्शन खंडित करणे, थकबाकीरांची नावे, वृत्तपत्रात प्रसिद्ध करणे, झोन दाखला, जन्ममृत्यू प्रमाणपत्र न देणे, मालमत्ता जप्त करणे, गाळे सील करणे इत्यादी कडक कारवाई करण्यात येणार आहे अशी माहिती मुख्याधिकारी डॉ. सुधीर गवळी यांनी दिली
